Mar 6 | DOB | STEP | Ta Yesu 'iila tauna 'ina 'asaya, ga 'ina tononoyao simuliyena.

Mark 6

Me Nasaleta Yesu siguitoyasena

(Madiu 13:53-58; Luke 4:16-30)

1 Ta Yesu 'iila tauna 'ina 'asaya, ga 'ina tononoyao simuliyena. 2 Ga Sabateya 'idi anuwa tapwalolo 'ena 'ilugu ga 'itoolo ta 'ie'ie'ita ga tomota sinonona, ta yauyaudi nuwadi 'iowana 'ina mwalatoi be 'ina guinuwa manudi, ga sigwae, “Tai gete mane 'enega 'ina sinasinapu 'ilobena? Ta wate guinuwa nidi waiwaidi nimanega 'iguinuwedi, mane 'enega 'ina waiwai 'ilobena?”

3 Ta wate sigwae, “Tai gete to'abi'abi tuga aga? Ta sinana Meli, be tasinao Yemesa be Yosese be Yudasa be Saimoni be wate nuunao ma'edao tamiyami, aga?” 'Enega tomota Yesu siguitoyasena.

4 Ta Yesu 'ieonedi, 'igwae, “Palopitao 'adi 'amayaba silobaloba mali 'asa 'ediya. Ta taudi 'idi 'asaya esiya nigeya 'adi 'amayabamo, manuna taudi 'idi bu'unao be 'idi susuyao siguitoyasedi.” 5 Ta Yesu nuwana 'iowana manuna tomota nigeya siemiemise, 'enega nigeya kapekapeyana be guinuwa waiwaina bada 'ida guinuwedi. Nate namo tole'oasao pu'epu'edimo 'igitoodi ga sibobo'ana.

7 Ga 'ina tononoyao site tuwelo 'ibwauyedi ga 'iloinedi be 'aene 'eluwa 'eluwa sida sakowasi 'asa 'ediya, ta wate loina be waiwai 'i'ebwa'edi be 'enega sawesawediya yaluyaluwa bi'i tomota 'ediyega sida ula apwesedi, 8 ga 'ina guguya 'enaya 'iloinedi, 'igwae, “Geya'abo 'ebweu to'ase wa'ewa'ewa. Geya'abo masula nai tana nai mani 'abwaga manuna. Nate namo 'imi 'etoguna nimamiya, 9 be 'ami 'aelawa wa'otedi, ta esi geya'abo 'ami 'oama 'eluwena wa'ote'otedi.”

10 Ta wate 'ieonedi, “'Eguma to anuwa 'ena sibwauyemi be 'ena walulugu, anuwa nina 'ena wae'owaga be 'ana laba sena nina wapilisine. 11 Ta sa'i 'eguma 'asa 'aina 'ediya waapwesa be tomota nidi nigeya si'au'au'ewami 'idi anuwa 'ediya be wate nigeya 'imi guguya sinoonodi, 'asa nidi nedilina 'aemiyega waloutuutu yauledi ta wapilisinedi, be 'enega wae'itadi 'aene 'iabe mwau 'ediya 'iapwesa.”

12 'Enega 'ina tononoyao nidi sisakowasi 'asa yaudi 'ediya, ga siguguya be 'aene tomota 'idi bubuna to'umalidi sida guitoyasedi be sida nuwa'ebuni, 13 ga yaluyaluwa bi'i tomota 'ediyega siula apwesedi, ga tole'oasao yaudi wate bunamega sie'abidi ga sibobo'ana.

Yoni togiebapitaiso 'ina mwawasa

(Madiu 14:1-12; Luke 9:7-9)

14 'Enega Yesu tetelina tomota silelewanena sena yauyauna 'ediya ga Kini Elodi 'inonona. Manuna 'aina tomota sionaona 'aene “Yoni togiebapitaiso mwawasega ni'atu 'itoolo limana 'enega ma ina waiwai 'iguiguinuwa.” 15 Ta 'aidi siona 'aene, “Tauna Ilaitiya.” Ta 'aidi wate sigwae, “Tauna palopita 'ebweu 'atuwa gimi palopitao.”

16 Elodi wate ni'atu tetela 'inonona ga 'igwae, “Nai tauna Yoni togiebapitaiso. Lowa yaloemwawasina ta sa'i 'itoolo limanaya.”

17 Manuna lowa Elodi Yoni 'igiyaina ga deliya 'iyonina, ta Yoni 'ana giyai 'alena nate 'ebweu waine 'ana esana Elodiyasa, nate Elodi tasina Pilipi mwanena ta Elodi 'i'oayena, 18 ta Yoni Elodi 'ieonena 'aene, “Gote nigeya bubuna bobo'ana, manuna tasiyo mwanena 'u'oayena.”

19 Ta Yoni 'ina guguya gete manuna waine nina 'inuwa mwau 'ai'aila ga nuwanuwana be Yoni 'ida loemwawasi, ta nigeya sawesawenaya 20 manuna Elodi 'iegagalena 'aene Yoni nina tai palupaluna ta Yaubada 'ina toguinuwa 'ebweu, 'enega Elodi Yoni 'i'amayabena ga tuta yauna Elodi nuwanuwana ga Yoni 'ina ona 'inonona ta manuna 'i'atesa'ala.

21 'Enega Elodi nina 'ina 'asiyata tubuwa 'iapwesa ga Elodiyasa ni'atu 'eda 'inuwa lobena Yoni 'ana loemwawasa manuna. 'Asiyata tubuwa nina 'ana we'iwe'iyaya masulina siguinuwena ga 'aina 'owaga sibwauyedima sabi 'emasula. 'Owagao nidi gabemani 'adi toloinao be tolosaiya 'adi toanuganao ta 'aidi Galili 'asanao 'idi 'inapwanao. 22 Tuta nina Elodi ma 'ana 'owagao si'e'ai, Elodiyasa natuna mewainena 'iluguma matadiya ga lausega 'igie gwausowalidi. 'Enega Elodi gomagweine nina 'ena 'iona oboboma 'aene “'Eguma to yage 'uesinuwa be 'usidegu yada tagwala 'emuya.” 23 Ga wate 'iona upaupa sawatamatamana 'enega 'igwae, “Ona'ai'aila yaona upaupa to'ase nai yada 'ebwa'eyo, 'eguma nai 'uda sida be 'aene 'igu 'ebeloina yada weyali manuyo.”

24 'Enega gomagweine nina 'iapwesa ga 'itauya sinana 'ena 'ienaida, 'igwae, “Sinagu, to'ase 'imu nuwanuwa be kini 'enaya yada side?”

Ta sinana 'igwae, “Kini 'ueona 'ugwae, ‘Nuwanuwagu Yoni togiebapitaiso bulubuluna.’ ”

25 'Enega gomagweine 'ilomanini ga 'iila kini 'ena ga 'igwae, “Nuwanuwagu gete tuga Yoni togiebapitaiso bulubuluna gaeba 'ena 'usa'u be 'u'ebwa'egu.”

26 Ta Elodi 'inuwamwau 'ai'aila, ta nigeya kapekapeyana be 'iguitoyase, manuna ni'atu 'isawa tamatamana 'owagao matadiya. 27 'Enega deli 'ana to'ita'i'ita 'ebweu 'iloinena be 'aene 'ida tauya be Yoni bulubuluna 'ida me'e. Ga 'enega to'ita'i'ita nina deliya 'itauya ga Yoni 'otona 'i'upwena, 28 ga bulubuluna gaebaya 'iusena ga 'ime'ena, ga gomagweine nina 'i'ebwa'ena, ta tauna 'i'ewena ga 'itauyena sinana 'enaya.

29 Ta Yoni 'ana tomuliyao 'ina esilae tetelina sinononaya ga simai ga Yoni kokowana si'ewena, ga sisa'u 'ali'aliyena.

Yesu pwalu 'ie'enidi

(Madiu 14:13-21; Luke 9:10-17; Yoni 6:1-14)

30 Ta ni'atu Yesu 'ina topaisewao site tuwelo siilama ga Yesu 'ena 'idi paisewa be 'idi e'ita maibo'ana sisimanedi. 31 Ta tomota yau wawasae simeemai ta siilaila ga 'enega nigeya kapekapeyana be Yesu ma ina tononoyao sieyawai'ata be si'a'a, 'enega 'ieonedi 'igwae, “Sena getei tada pilisine be tada tauya sena mwatui daitaya be gote 'ena tupwana waeyawai'ata.”

32 'Enega taudimo waga sigeluna ga sitauya 'ebweu sena mwatui daitaya.

33 Ta pwalu nidi Yesu ma ina tononoyao 'idi gelu si'itena ga si'inanedi, 'enega taudi be 'asa yaudi 'adi tomiyanao wate ma'ediyao 'edega sipili ga sigimiapwesa sena gote 'enaya.

34 Ta muliyega waga 'ilugu ga Yesu 'isuya dabalaya ga boda sinabwana kaukauya 'i'itedi, ta 'i'atenuwa 'ole'oleyedi manuna taudi 'atuwa nadigega sipiyao nigeya 'adi to'ita'i'itamo, 'enega 'ilolagata ga sinasinapu yauna 'ie'ie'ita 'ediya.

35 Ga 'asuinuwanuwaya 'ina tononoyao simai ga Yesu sieonena, sigwae, “'Inapwana, sena gete mwatui daita ta ni'atu sinala 'isugusuguwa, 36 'enega pwalu getedi 'uda etunedi be sida ila be 'adi masula sida gimwane 'asao be anuwao selabediya 'ediya.”

37 Ta Yesu 'ieonedi, 'igwae, “Ta mwa'adega? 'Omi geya'abo wae'enidi, aga?”

Ta 'ina tononoyao sigwae, “'Inapwana, nigeya sawesawemaya, manuna maibo'adi 'adi masula 'ana maisa nai tu analedi kina nadigega.”

38 'Enega Yesu 'ieonedi, 'igwae, “'Eisa beledi 'emiya? Watauya be wa'ebesa.” 'Enega ni'atu silobena ga Yesu sieonena, sigwae, “Beledi nima ta iyana 'eluwa 'alobedi.”

39 'Enega pwalu 'iloinedi be maibo'adi simiyatowa boda be boda pwatulaya. 40 'Enega siweyalidi ga simiyatowa, 'aina boda tomota 'adi yau analedi, be 'aina boda tomota 'adi yau pipiti nadigega.

41 Ta beledi nima be iyana 'eluwa 'i'ewedi ga galewaya 'i'itatu'e ta 'iona oboboma masula nidi manudi, ga muliyega beledi 'igitomwedi ga 'ina tononoyao 'i'ebwa'edi be sida eguyaiye tomota 'ediya. Wate iyana nadigega 'igitomwedi ga 'ina tononoyao 'i'ebwa'edi ta 'enega sieguyaiyedi. 42 'Enega maibo'adi si'ai ga gamwadi 'ipawa. 43 Ta beledi be iyana tupwatupwadi siegogonedi ga kodo tuwelo siloemaedi. 44 To'e'ai nidi taidimo 'adi yau paibi tausani nadigega.

Yesu ola debanega 'itautauya

(Madiu 14:22-23; Yoni 6:15-21)

45 Ta muliyega 'ina tononoyao 'iloinedi be wagaya sigegelu, 'igwae, “Wagegelu be wanugana Betesaida mali esenaya, ta 'abo'agu bada 'etamo boda yaemataluwedi be siila 'idi 'asaya.”

46 'Enega sigelu ta Yesu pwalu 'ietunediya, ta muliyega 'itu'e 'oyaya sabi sidasida Yaubada 'ena.

47 Ga ni'atu 'iboi, ta 'ina tononoyao bwagabwagaya si'ada'adau, ta tauna sa'i tebweuna dabalaya 48 'i'itedi 'idi neya 'enega silo'ame'ame manuna yagila matadiyega 'imeema.

Ta tomwa uliulitaya Yesu ola debanega 'itauyama be 'aene selabediyega 'ialogedo be 'ida pilisinedi.

49 Gote 'ena 'ina tononoyao maibo'adi Yesu si'itena ola debanega 'imeemai ga sinuwena 'aene welabana, 50 'enega simatauta ga sinanala.

Ta Yesu 'ieonedi, 'igwae, “Geya'abo wamatamatauta. 'Abo'agu tuga, 'imi 'inapwana.”

51 Ga wagaya 'igelu ma'enao ga yagila 'ipela. 52 Ta nuwadi 'iowana sinabwana, manuna Yesu 'ina waiwai manuna nigeya sinuwanuwa sabwaleni. 'Eguma tuta nina tomota yaudi 'adi beledi Yesu 'ieguyai be 'alena sida mwalatoni be 'enega sida nuwasabwaleni, ta tuga nigeya simwalamwalatoni, manuna debapa'alidi.

Tole'oasao 'igie bobo'anedi sena Genesaleta 'ena

(Madiu 14:34-36)

53 'Enega siabala sena Genesaleta 'enaya ga le'awinaya silugu ga 'idi waga gote 'ena siloomuna. 54 Ga tuta nina sisuya toni'asa Yesu si'inanena, 55 ta 'enega tomota nidi sipili ga sitauya 'asa maibo'ana 'ediya ga tole'oasao sime'edi 'ebe'eno 'ediyega be Yesu 'ena sitauyedi to sena 'ena sinonona 'imiyami.

56 Ga Yesu 'isakowasi sena yauyauna 'ediya, 'aina 'asa sinabwadi be 'asa gidalidi be 'ebe bagula 'ediya. Ta tomota yaudi 'idi tole'oasao sime'edi ga 'ebe gimwane 'ediya siyamwayamwa ta sisidena sigwae, “'Inapwana, kapekapeyana be tole'oasao getedi 'amu 'oama tupitupinamo sida gitoo?” Ga Yesu 'ediya 'itagwala. 'Enega taudi 'ana 'oama sigitoona sibobo'ana.